呢個世界「正義」同海鮮一樣，係時價不同，回歸初期，莊豐源案，有一班人呱呱嘈，話內地人來港，唔會踩沉香港，於是扮曬正義，搞物搞物上街，要爭取「家庭團聚」，結果因為有莊豐源案呢個缺口，於是大批內地人來港生仔博居留，這樣一來，醫院產科供不應求，700萬人的資源，光是廣東一省億多人，就可以食窮你，於是唔少當年支持「家庭團聚」，現時就叫「中國人滾」，你話係唔係諷剌呢，現時又有人要搞「家庭團聚」，恐怕「正義朋友」消失囉，這無他，過往是抱住「優越感」去幫助「弱少」，現時優越已遭人潮淹沒，變成討厭 ，真係睬你都有味。

內地同香港融合係無可避免，內地經濟好，來港炒樓、買名牌的土豪多，近日上面環境唔止遊香港，買名牌去歐、日，來港變了水貨客，來掃日常生活用品的內地人一樣咁多，這證明零售已經成為養活港人最大的行業，現時有人要玩「港獨」、派殖民地旗（所謂龍獅旗，係有人開演講會時派的，因為冇門路，你買給我看）這是帶領香港走入絕路！

內地客在開放後，越來越有錢是事實，雖然因教育問題，部份人行為唔係咁好（例如隨地大小便、排隊打尖等），但卻是香港這間店的「顧客」，你開店，就唔應該怕客人「大食、厭尖」，但現時有人卻要拒內地人，你話係唔係想間舖頭「執笠」？

此間唔少「藍血人」，學足以前英國佬，視自己比別人「優越」，（過往英國佬統治印度，就係抱住呢種態度，他們對印 度人的「同情」，係抱著「我比你叻，所以發善心幫你」的心態），但現時發覺內地人洶湧而至，「優越」已遭淹沒，施展不來，於是假面撕下，進行「赤裸裸」反內地抗中，甚至惡言相向，叫人唔好來。「莊豐源式後遺症」不斷發酵，未來演化成點仲未知，但過往的「正義朋友」現時就「匿港九年小童」都要趕，思昔日、看今時，「正義」係晤係海鮮價？

「正義」係海鮮價