現代人食得好，營養足，加上缺少運動，到中年時，最容易得二型糖尿病。

糖尿成因是胰臟功能衰退，故此護胰就是現代人保健的要務。如何保護？據說城中的有錢佬，大多會在飯後來杯咖啡，有護胰作用，但一日不可超過四杯。

醫學界認為：咖啡含有三種成份，可以防止胰臟受損、維持胰島素的分泌，這包括咖啡因、咖啡酸、綠原酸。喝咖啡不用多，自己冇時間冲，去「麥記」買小杯裝就夠力，但記著不要放糖，加少許奶即可，醫學研究話，每天飲三、四杯咖啡，患二型糖尿病風險，可以減低一半。當然，凡事有利必有害，飲咖啡太多，就要慎防生腎石！

古人話「食得是福」，今天「唔食得」才是好，因為「三高富貴病」盛行，若年過五十，血壓、血脂、血糖俱及格，真係勝過中六合彩二獎，不少阿叔、阿伯話「打工掙到錢，一半係睇醫生」，因為食降壓、降脂藥不知幾普遍，一邊食自助餐一邊食降糖丸，都唔知是折墮抑或係作孽。

最諷剌係有「食家」，本身有二型糖尿病，卻在媒體上教人如何「揾食」，又話呢家食肆有招牌菜，那家有鎮店餸，點樣點樣好味，引人去光顧，自己食出病唔戒口，仲要「害」多幾個人得糖尿，是否荒唐到極？因為甘脆香濃下肚多，人的胰臟才「頂唔順」出事也。

不過，咖啡唔係人人受得，要看自己體質，若飲後失眠，心跳加快就不宜學。

飲咖啡護胰臟