「藍血遺老」學府演義

近日最好睇的，自然係「遺老」與「新貴」爭「學府」的話事權，「遺老」處下風，於是「高貴」面具撕下，「爛仔」行為盡出。

英國佬年代，呢家「學府」係家丁培養所，學術成就除了醫科外，不見得有成就，倒是做官的終南捷徑，培育出來的家丁，係中國人同中國人都要講「鬼話」方顯得「高貴」。英國佬雖敗走，但苦心經營的「家丁學府」卻成為「遺老」力保的「精神堡壘」。

第一任特首董伯曾想伸手入去，但被「遺老」抓到「干預學術自由」痛腳，連「新貴」安排入「學府」做阿頭的亦被迫下台。一戰成功，令「遺老」大長志氣，誓保「金城湯池」，鼓吹「港獨」，希望有日「變天復辟」。

在董伯衰了之後，有一段長時間果然冇人敢碰「精神堡壘」，而打著「學術自由」呢塊爛招牌，經之營之成為「港獨」大本營。因為所謂「教習」十個有八個係「遺老」自己友，好多係終身鐵飯碗無得炒魷，在實行「散毒」同「散獨」時冇有怕。藉「學府」大量培訓新血，同後生仔「洗腦」，甚至囂過英國佬年代，要任命阿頭，都要睇「遺老」面口。結果華人地方居然要搵個唔識中文，不懂國、粵話嘅頭頭咁嘅怪現象。

「家丁」在英國佬年代時「純如羔羊」，有年「英國包租婆」來訪，成班奴顏婢膝，睇舊報紙照片都覺得「核突」。但換旗之後，就惡過乜「阿爺」派丞相來視，賀賀呢家「學府」，豈料「遺老」一面唔順，發動「靚仔」示威，玩到咁串，「阿爺」自然難以容忍。

老實講，一般小民對「遺老」並無好感，在英國佬年代班「家丁」狐假虎威，只能「忍」。今日大家咁高咁大，睬你都有味。而「阿爺」臥榻之旁，豈容「遺老」繼續撒野，今番「遺老」想安插自己友做學府頭目，「新貴」再冇咁順攤，實行出手「鍊」過。

玩政治唔係「遺老」先有計，一鬥之下乜野爪牙盡出，都係唔得，再抬「學術自由」呢塊爛招牌出來，再冇人聽呢支笛，於是只好爆陰毒放偷錄矣。（之一）