反對派議員，一向站在「道德高地」，對甚麽「官商勾結」罵得震天響，但現時被揭穿，所謂「正義」背後，亦是見錢開眼，「政商勾結」臭不可言！衰咗，有證有據，本來認命就是，「食得鹹魚抵得渴」，但仍要死撑無收錢，則應該追究下去！
最滑稽是：金主話有，因「送出」數十萬元，是其「血汗錢」，但收錢的竟然話冇，這樣是否中間有人「落隔」？若然被人中飽，那就該煨了，咁「辛苦」（要去到第三世界做地產，長途跋涉，真係有血有汗）揾來的錢，去了哪裏？當然，錢是用劃線支票過户，以金融中心的銀行來說，要做手脚「吞金」不容易，但「收咗錢」唔認，當中顯然有問題，若事件無人「踢爆」，則議員與商人勾結，收了錢替人辦事或作其他用途，永遠冇人知，最離奇是有人不認「收了水」，當中顯然是大有文章。
按照「前廉署官員」說法，送錢給人未必有罪，則收錢者何須死口話冇收過？讀者可以推理一下，在立法會來說，既然出現「羅生門」發展，是否要辦聽證會，傳召有關人士來解釋，向市民作出一個交代，有人話幾十萬係濕濕碎，但在選舉季節，就不無幫助。
而奇怪的是：官營電台「皇帝唔急太監急」，馬上找來「時事評論員」分析，話放料係侵犯「私隱」，呢位阿叔做過傳媒，當年程介南事件又唔見有人咁講，至於誰抹黑誰，都係金主與當事人轇轕，唔係有人踢爆，冇人再去掘深點，真相永遠不會大白！
題：是誰抹黑誰