全民退休保障，十劃未有一撇，已經意見多，究竟人人派定審查過資產先派？三千唔夠要三千五啱唔啱？使唔使加稅？有人不停呱呱嘈！
在外國，退休保障係睇納稅多寡，決定拿到的錢有多大，此間不少大喊十，就認為唔應該人人派，要審查過資產先畀，這樣對交薪俸稅最多的中產，殊不公平，因為一味交稅無得享福利，即係揾中產笨。當然，做註冊教師、公務員有公積金、長俸，羊毛出自市民身上，剔除係應該，但一般打工仔，辛辛苦苦儲起一、兩百萬元養老，是否就排除於受益人之外？點解唔計交薪俸稅多寡，作為派錢依據？那些每年交近億薪俸稅的，可以唔攞退休保，但他們的貢獻是不能抹煞的。

其次，係金額，要生活過得舒適，自然係錢越多越好，派三千，每日有百元可用，夠吃兩餐，但若將租金、水電、交通、睇醫生等加加理落去，則三千五百元亦未必夠，問題是錢從何來？若然政府出資五百億後，勞資最高供月入2.5%，咁細數目，係人都知係「杯水車薪」，外國起碼抽入息三分一，但抽得多，必然影響消費，睇少場戲、買少件衫、食少餐飯，惡性循環下，市道萎縮，裁員增加，大喊十之輩，又呱呱叫矣。

有蠶蟲軍師，一味打商界主意，錢唔夠就加利得稅，這樣是飲鴆止渴，當全世界都減利得稅吸引外資時，香港要反其道而行，是否迫人「走資」，製造更多失業？本欄提過，要行全民退休保，應打賭博稅主意，將賭波收益抽出來，注入退休保內，影響可以減到最小，舊錢每年起碼有一百幾十億，何樂而不為？

全民退保如何生財