田北俊遭革除政協常委之職，有人話係殺雞儆猴，其實係敲山震虎。

城中都知道，田少的說話，有時與某超級富豪好接近，超級富豪唔想講的，不少由其他人把口反映。好似今次「佔中」風波，大家都知道，幕後有外國勢力，唔係點會有錢、有物資、有運輸，調動快過警察。

超富免得過都唔開口，因為他們好多在西方國 投資，但亦想在香港發財，言多必失，因為去得盡，在外國的投資分分鐘被人攪，天下烏鴉一樣黑，你信公平法治就係儍仔。但唔講話撑港府、阿爺又唔滿意，於是就住、就住講幾句，不過難勸退班學生，田少叫人辭職，係其中一個方法，因只要拉咗人落台，面上有金，退場都有彩也。

但阿爺認為，上次所謂50萬人上街，犧性咗董伯，反而令反對派「心雄」，次次讓步唔係辦法，於是「反梁等於反中央」，呢句話係向建制派傳達，目的係要求團結，田少不知是否無心，講咗句忌諱的話，阿爺認為「當我把口無鋼？」於是兩天之內， 革走田大少，此間反對派，只識「敵人反對的就讚成」乜健筆就將田捧到天上有、地下無，仲話係2017特首大熱，你估會唔會呢？

有少少政治常識都知道，冇北京祝福．選乜都唔靈，咁容易做特首咩！

做政客，心直口快係無前途，田少最終與唐少一樣，慢慢淡出，影響最大，是商界旳超富，唔知找誰來代言，淨係看自由黨找黨魁咁頭痛，就知今次敲山震虎，真係震到內傷！

敲山震虎震到內傷