「名校」要轉直資，有人呱呱嘈話「剝削基層」入讀精英學校的機會，但過來人話「基層想入名校？即使幸運地分派到，都唔好讀」因為認響子女心理至大。
香港的名校多是有錢佬、權貴、專業人士子女的樂園，過往基層去叩門，真係啋你都有味，早年有個知識分子從內地新移民來港，唔知頭唔知路，寫了封信給名校校長想替子女插班，結果人家覆也不覆，事後給人笑「住模範村想入名校？哈哈哈！」。
 舊日小學有會考，成績好的分發到入名校、但少年見到同學出入有名車接送，自己要坐巴士返學，心理上已經有自卑感，加上穿的校服稍皺（舊日校服要用漿粉水漿過，再用熨斗熨，先會筆直，窮人洗完冇漿衫，很容易皺）會被同學笑，穿來運動的「白飯魚」（帆布鞋）稍為磨損有洞，亦被人笑，在心理壓力下，五年中學過得殊不快樂。呢種讀錯「名校」的故事，在昔日的粵話片題材中，都唔知拍過N次，無綫的深宵電影，不時可見。
因為「名校」被某一階層所壟斷，基層不是這杯茶，所以自已知自已事，無謂讓子女在這種環境下成長！大概在前年，有位讀草根小學的學生，因打籃球技術出眾，有家「直資名校」睇中他的球技，招攬他入學，仲話給他獎學金，但呢位草根少年有腦，他知道名校只不過看中他的球技，想買入他為名校面上貼金，一旦他受傷，球技退步，分分鐘「失寵」，屆時「獎助學金」無晒，窮人家負擔唔起學費，那時正式半天吊，這位草根少年於是對「名校」說不！這才是叻仔。
有人話「名校」都有派位收基層，不過好多有錢子弟話收了派位生，令學校成績下降，文憑試出唔到「狀元」冇得曬命，好多要求轉直資就係因此而來，唉，鬼唔知咩，有錢佬子弟四、五個補習先生，基層無法做到，成績自然差，這樣「名校」變得不馨香，於是唔係用直資來趕走冇錢的窮鬼囉。
 
「名校」不是基層那杯茶